Hulog ng langit

Sabi nila may mga ibinibigay daw ang Diyos na di mo inaasahan. Di hinihingi. Di inaasam pero kusa na lang dumarating. Hulog ng langit ika nga. Kadalasan tao ang tinutukoy. Pero may mga pagkakataong nakakaranas tayo ng mga taong ganito... mabait sa una, parang anghel. Hulog ng langit eh. Di natin alam ang inihulog pala ng Diyos na yun mula sa langit ay diretsong impiyerno sana... SINALO lang natin. Demonyo pala. Kaya maraming mga misis ang nagmumukhang lola dahil sa mga demonyong asawa. At mga nagiging tanga dahil sa demonyong kaibigan.

Pero hindi lang lintik na pag-ibig ang inihuhulog ng langit, may mga bagay din. Bagay, literal.

Kaadikan ko sa paglalaro ng dota nuon. Kasama ang aking mga barkada. Pagkatapos naming maglaro, diretso kami sa mamihan o tapsihan. Kain lang saglit tapos shot na.

Isang gabi pagkatapos mag-dota, kami na lang ng barkada kong si MrPatok ang naiwan, nag-uwian ng lahat. Nagkayayaan kaming dalawa uminom. Napagdesisyunan naming sa kanila nalang magshot para tipid. Dahil wala akong pera ganun din siya. Emperador pwedi na yun.

Habang naglalakad naisip ko may laman pa pala ang ATM card ko, kaya sumaglit kami sandali sa pinakamalapit na ATM machine. May dalawang estudyanteng bading na nagwiwithdraw. Parang badtrip ang dating, kinakatok ang ATM machine. Parang wala namang laman to!.. parang ganyan ang naririnig ko sa naiinis nilang mga boses. Antagal nila, buti gabi na at kami lang ang nakapila.

Umalis silang resibo lang ang dala. Nang saktong ipapasok ko na ang ATM card ko... tangNa may lumabas... DALAWANG LIBO! Nasa kuhanan ng pera. Pero hindi ko muna kinuha. Paglingon ko nandun pa ang mga bading papalipat ng daan. Imbes na habulin ko, kaibigan ko tinawag ko. Pagtingin ko ulit sa ATM machine nawala na naman ang pera. Pero ilang segundo lang lumabas ulit. At dun ko na kinuha.

Naisipan naming ibalik ang pera, nagtungo kami kung san kanto sila pumasok. Pero di namin sila nakita, kaya hinayaan na lang namin.

Nagkatinginan kami ng kaibigan ko. Lumalaki ng lumalaki ang mga ngiti namin. Sakay agad ng dyip diretso sa gimikan. Ang dating emperador lang sana, ngayon napakalamig na redhorse at may kasama pang napakadaming pulutan, with background music pa. Hay... sarap...

Sabi nila pag nakapulot ka daw ng pera gastusin mo agad... at lahat. Di ko lam anung meron sa kasabihan na yun. Pero ganun nga ang ginawa namin.

Kinabukasan, hangover. Binalikan ko ang kagabi. Bigla akong nakonsensiya. Naisip ko kasi baka allowance yun ng dalawang bading, pinang-inom lang namin. Pinaghirapan ng kanilang mga magulang yun, tapos kami inisang bagsakan lang sa inuman. Parang kulang ang effort na ginawa naming paghahanap sa kanila. Iniisip ko na lang sinadya nilang iwan ang mga yun, pero mukha rin silang mga walang pera. Mga mukhang naluging bakla.

Di ko tuloy alam kung hulog nga ba talaga ng langit yun o kaming mga demonyo ang inihulog ng langit.